Левковские

[q]

Публикуется впервые
86. Облята Декрету кондесценсионального, ораз и дукту граничного между селами Коптевщизна, Покалевом, Полохачевом и иными през уряд подкоморский и земский Киевский, сталого.

Року 1715 месяца января 15 дня.

...Мы теды уряд, приступивши до дукту стороны поводовой на месте до пяты конца нарожнего удалися, и рушивши от того месца, то есть от Вязка назад Гостинцем Ровником ку Веледникам, сталисмы у пяты границы Коптевской з Норынской, на урочищу названым Обалки, а од Балков болотом до леса Плоского, а од того леса долом к Гостинцу Ровнику, до долины ...звенской, где жодных копцов немаш, по левой руце грунт Ширковский, а по правой Коптевский, с тей долины на гора на Язвины, ямы покопаны межа стара аж до Крестов каменных, которые стоят зараз при дороге Гостинцу большом з Веледник до Овруча идучим, од тых Крестов тым же Гостинцем аж до Вязка урочища, по левой стороне грунт Серковский, по правой Коптевский. И почавши од той пяты от Обалков и аж до Вязка без контроверсии та граница и грунты зостала, и тут становивши у Вязка для настанья вечера акт тен на день другий одволать розказали... 23 октября... сторона поводова дукт свой от того Вязка почавши, где дорога з Скребелич, не бардзо уторована и перед Гостинцем идучая до Коптевщизны якбы настае, од тего месца провели, не доходя зарослей болеголова, который на Гостинцу Старым Ровнику растет, сторона позванная, стоя с подданными Покалевскими и Полохачевскими далей того дукту боронила, жодного документа не показывая, только на старых людей указывая, манифестовала, а сторона зас поводова, демонстрируя перед нами дукт ведлуг документу своего, реманифестуя, дорогу Ровником Старым проводила ... аж до грунту Микулинщизны, который грунт есть между дедичами Матвеевич и Покалева, та ж дорога до грунту Полохачевского, до долины Можевуской, напротивко которой при самой дороге, по правой руце идя ку Овручому и до Кичек урочища Копчик Малый, оттуда та ж дорога Гостинцем до Кобызевой дороги з Полохачева до Коптевщизны идучей, по тей стороне дороги грунт менили за свой их милости панове Геевские, але на то жодного документа не показывали, а в посессии панов Гривского и Рудзковского зостае, та ж дорога Гостинцем Ровником до Копчика по левой руце будучего, где собе сторона поводова менила Кичками, сторона зас позвана, их милости паны Геевские и Клинецкие подданные не довели, и иншие Кички показывали, долиной назад трохи воротившись до Вязка, называя Кичками...
Пришли до дороги з Покалева до Коптевщизны идучей, там копцов два, один по одной, другий по другой стороне дороги высыпаны, од той дороги зарослями болиголова на взгорках копцы сыпать казали, при дубку пагорб продолговатый... копец всыпали, оттуда такимми ж знаками... межи границами копцы сыпать казали, а так пришедши противко курганам по левой руце ку дороге Ровнику стоячи, подданные Покалевские по той свой грунт быть менили и на те курганы, межуючие с грунтами Полохачевскими, показывали, где противко тых курганов копец на рожне большой всыпать казалисмы... на которые подданные Покалевские... поприсягали... од тего копца подданные Полохачевские далей дукт... граничный провадзили, где мы копцы сыпать казали, и пришедши до дороги з Полохачева, идучей до Коптевщизны, копец при той дорозе всыпаны, а од той дороги... до Кичек идучи през их милости панов Геевских...


См. 1 Księgi ziemskie kijowskie 1712-1716 Л. 646-659 №86.https://skanoteka.genealodzy.p...amp;zoom=1

[/q]

[q]

Я Есифъ Михайловичь Халецкий, державца Овруцкий, смотрелъ есмы того дѣла на року зложономъ очевистого мовеня, становившись на кгрунте, въ острови, на селищи въ Коннорога, гдѣ собѣ кривду быти менилъ земянинъ господарский Невмирицкий Солуянъ Сидоровичь з сынами своими: Дмитромъ и Яковомъ, од тыхъ же земяновъ господарскихъ Невмирицкихъ, себровъ своихъ: одъ Гридня, а Оникия Сидковичовъ, а одъ Федора и Андрея и одъ брати ихъ Гридковичовъ, въ забраню земли своей власное пашенное и дубровъ, засевковъ, сяножатей и о дерево бортное, старое, въ земли сполечной з ними, которое подъ его знаменемъ подъ себе забрали и въ свой подводъ подписали; жаловалъ земянинъ господарский, Солуянъ Сидоровичь на Гриня и на Оникия Сидковичовъ тымъ обычаемъ: то есть нива, на которой ваша милость теперь стоите, власная моя, жеребя Несторовского, дядка моего, который жеребей его в ихъ рукахъ былъ, который жеребей тое зими прошлое, на великомъ валномъ сейме, у Вилне, будучи намъ при господарю его милости, мнѣ поступился и листъ свой на то мнѣ, по сведому и печати вашей милости данъ, ижъ ся вже в той островъ не мели николи вступати, который передо мною оказовалъ и былъ читаный, въ которомъ то листе обмовляетъ такъ: ижъ Гринъ Сидковичь, маючи зуполную моцъ и поручене отъ брати своей, Оникия, вгоду и зеднане з нимъ принялъ, жеребей Нестеровский, дядковщизну его, и заруками обвезалися на господара короля его милости пять десятъ копъ литовскихъ, а на сторону скривженую тридцать копъ грошей литовскихъ платить, еслибы чимъ утой жеребей Нестеровской вступовать мели; а такъ теперъ через тотъ листъ, и поступене свое, и заруки тую ниву мою и поступене свое, и заруки тую ниву мою Нестеровскую пашуть и оную моцно на себе всю посеяли, а тотъ есть островъ мой обрубный, нивы и сяножатни имъ в томъ острове нетъ, одно бортю входъ маютъ, и в судереви мнѣ во всемъ од нихъ половина, такъ в земли пашенной, якъ в бортной, в дубровахъ и в сeножатехъ. А Гринъ и Оникей Сидковичи з сябрями своими Гридковичами, одпираючи на жалобу его, поведили; то есть поле наше, отчизное а не Нестеровское, бо намъ в томъ тутъ острове половица од него во всемъ. А Солуянъ противко тому мовилъ: не маете вы ничого в томъ острове, одно входъ в бортю, бо вы напротивко тому острову маете тежъ обрубный островъ, на имя Слышовъ. Я, выслухавши словы ихъ, обохъ сторонъ, пыталъ Гридня и Оникея и сябровъ ихъ Гридковичовъ, которую часть земли Солуянъ одъ нихъ маетъ, и в томъ тежъ острове ихъ Слышове, чи маетъ з ными входъ нивою, сенажатми и бортнымъ деревомъ? А они поведили, ижъ во всемъ отъ нихъ половицу маетъ, яко бортнымъ деревомъ в бору, такъ нивами и дубровами и сеножатми, бо еще продкове наши з его продками въ ровный делъ поделили пашми, дубровы, сeножатми и службу господарскую по половицы з нами служатъ, а в островъ нашъ Максимовский и Слышовъ одно бортю входъ маетъ, а нивою и сеножатю ничого немашъ ему в томъ острове нашомъ; а намъ тутъ половица одъ него во всемъ. А Солуянъ и повторе на противко нимъ мовилъ: ижъ имъ толко в томъ острове его толко бортю тежъ входъ есть, а нивою и сеножатми имъ неповедилъ входъ мѣти, гдѣ поведаетъ и свои знаки властне в томъ острове моемъ, в купе, межи нивними, яко отецъ мой изъ своею братею, з Ешутою и зъ Нестеромъ делили той островъ, и грани тежъ слушные того острова мого у вободъ передъ вашою милостію видетъ и обвести готовъ; и напервей знакъ указалъ в томъ острове ниву, селище отца своего, отъ рубежа земли Матвеевское, паны Криштофовы, а близко тое другую Ешутину, а подле Ешутины третю ниву Нестеровскую, дядковъ своихъ; уси три за межами, а одъ Нестеровское ниви, поперекъ, ку долине указалъ также три ниве, зарослыхъ за межами, и поведилъ: ижъ тые межи кладены в той часъ, коли отецъ его з братею своею: з Ешутою и Несторомъ той островъ делили на трое, якъ се имъ одъ продковъ ихъ в деле досталъ, противъ того острова ихъ Слышова, который они и теперъ сами одни на себе держатъ; и указавши знаки в томъ острове, зась повелъ насъ границами того острова: напервей привелъ до речки Коннорога ку дорогe, которая одъ замку идетъ до Каменца, то есть пета, а отъ дороги речкою внизъ привелъ, где впала въ болото, которое называють Коннорозкое, а одъ болота сеножатю къ лозѣ коннорозкой, а лозою къ леску Борковому, а лескомъ до болота Боркового жъ, а болотомъ въ лесъ Есенецкий, въ речку Еceнецъ, а речкою Есенцемъ у верхъ, до дороги Каменецкое, а дорогою до болотца, которое подъ коннорозкимъ полемъ, а зъ болотца долиною, а зъ долины на гурку, межою, до рубежа земли Матвеевское, пана Криштофовы, и поведилъ: ижъ той островъ здавна такъ се в собѣ маетъ и в тихъ границахъ своихъ, и на томъ я хочу з сынами своими; Дмитромъ и Яковомъ права поднести, ижемъ того острова грани справедливе обвелъ, иже в тотъ островъ никого иншого входу нѣтъ, толко бортю; а Гринъ и Оникей з Федоромъ и Андреемъ и братю ихъ Солуяна з сынми его на томъ къ присязе допустили и ку пригледаню тое присеги даломъ имъ вижа, служебника моего, Гаврила Кудрицкого; который поведилъ передо мною: ижъ Гринъ, Оникей Сидковичи и ихъ сяброве: Федоръ и Андрей Гридковичи з братею своею Солуяна и сыновъ его къ присязѣ неповели и того острова в границахъ вышей менованыхъ, ведлугъ завоженя его, поступили имъ на вечность, а собѣ на противко того взяли островъ Максимовщину, на имя Слышовъ, штожъ они и сами, стороны передо мною вызнали, ижъ на томъ постановеніе межи собою учинили, в которой то поведаетъ дуброве и нивы наши деленые в межахъ, то и теперъ маемъ по половине держать, водлугъ стародавного обычаю, за тымиж межами стародавними, а я, въ томъ зрозумевши, ижъ Гринъ и Оникей Сидкевичи, из сябрами, Федоромъ и Андреемъ, братею своею Гридкевичи Солуяна Сидоровича и сыновъ его до присяги не повели, и того острова в тыхъ границахъ, водлугъ заводеня его ему поступили на вечность, а собе на противко того взели островъ максимовщину, на имя Слышовъ, выналезломъ теды Soluiana Сидоровича, зъ сынами его, Дмитромъ а Яковомъ и всказалъ есмы имъ тотъ островъ держати на вечность; и уже Гринъ и Оникей Сидковичи, Федоръ а Андрей, Иванъ а Сахно и Степанъ Гридковичи, въ тотъ ихъ островъ Коннорога немаютъ ничимъ ся вступовать часы вѣчными; одно бортю маютъ входъ мети; а Солуянъ Сидоровичь з сыны его въ островъ ихъ Слышовскій, также немаютъ ничимъ ся вступоваты, одно также бортею маютъ входъ мети. А що ся зась дотычетъ добровъ и иншихъ ихъ неделеныхъ нивъ, то маетъ Солуянъ, зъ сынами своими, з ними по половицы держати, за межами старыми, водлугъ стародавного обычаю, на вѣчные часы. Ко тому тежъ Солуянъ з сынами своими, а Гринъ и Оникей з сябрами своими, Федоромъ, Андреемъ и братею ихъ привели насъ на Селище названое, на которомъ домами своими седятъ, а за Солуяновымъ домомъ, почавши одъ ровка, попровадили насъ межею старою до дороги Ровника и поведили; ижъ по левой стороне Солуяново з сынами его, а по правой ихъ, по долину, а одъ долины дорогою Ровникомъ до курганца, а одъ курганца старою межею Ровникомъ узъ островъ Слышовский, до лѣса, который слывется Колокъ, по туюжъ долину, вышъ менованую дуброву солуяновскую поведили быть; а который выгонъ завозе (siс) передъ домы ихъ, тотъ выгонъ, зeзволившись обедве стороне, передо мною поделили на полы, и рубежи казалъ есмы зарубаты: по левой руцѣ Солуяново зъ сынми къ полю ихъ, а по правой Гриню и Оникию Сидковичомъ, а Федору и Андрею зъ братею ихъ Гридковичомъ; отъ домовъ ихъ маютъ они обедве стороне той выгонъ держати и его уживать, водлугъ дѣлу и зарубаня и рубежовъ на вѣчные часы. Тотъ же Солуянъ Сидоровичь, зъ сынми своими, жаловалсе мнѣ на Федора и Андрея и братю ихъ Гридковичовъ о сосну, которая подле ниви его в завозю, поведилъ, же то есть сосна моя дядковская, жеребя нестеровского, нижли они подъ себе забрали и подводъ свой ново на ней наложили, и поступити мнѣ оное не хотятъ. Федоръ и Андрей з братею своею, на то одповедили: то есть сосна наша, отецъ нашъ ее держалъ, а по смерти отца своего, мы ее держимо теперъ и поведили подводъ свой в той сосни старший и урослейший, нижли Солуяновъ, которые ся зезволили выколоть и коли оную сосну закололи, где менили быть подводъ свой, знаку жадного ненашли; и я, в томъ зрозумевши, ижъ они въ той сосни знаку своею никоторого ненашли, и нашолъ есми Солуяна Сидоровича з сынми его правыхъ, и всказалъ есми онымъ тую сосну ку своей руце мѣти и оное уживати на вѣчность, и на то есми Гриню (в ЦГИАК и АЮЗР неправильно: Андреюhttps://forum.vgd.ru/post/1231...#pp2672854) а Оникию Сидковичомъ, а Федорови, Андрѣеви з братею ихъ далъ сесь мой листъ, з моею печатю. А зо мною на тотъ часъ были земяне господарские: Онофрей Ивановичь а Тыхно Михайловичь Киркошка. Писанъ въ Невмирицкихъ, подъ лѣтъ Божого нароженя тисеча петъсотъ пятдесятъ второго, месеца Іюня двадцать четвертого дня, индикта десятого. У того листу делчого, граничного, печать малая есть притесненая.(Текст Листа Й. Халецкого см. также в АЮЗР http://books.google.com.ua/boo...mp;f=false)

См. РГАДА, фонд 389, опись 1, Дело 203:
5). 10.II.1603. Краков. Потверженье Невъмирицкихъ, Листы 5–9 об.https://forum.vgd.ru/1231/1829...iew&o=

[/q]

[q]

Публикуется впервые
105. Облята листу граничного межи Пещаницею, Жолоню и Геевичамы.

Року 1715 месяца августа 19 дня.

На уряде гродском в месте его королевской милости Овручим... пан Стефан Завялич Мочульский для вписанься до Книг нынешних ограниченье нижей инсероване русскими словами писаное, пероблятам подал, тенорис секъюэндис:

[q]

Выпис з Книг Есифа Михайловича Халецкого, державцы Овруцкого.

Лета Божего нароженья 1554 месяца июня 23 дня.

Смотрилем очевистого мовеня. А зе мной в тен час был пан Немир Сурин, а боярин господарский Грицко Тышкович. Жаловал мне земянин господарский Тыхно Михайлович Коркошка на боярина господарского Макара Геевича, иж дей он перешедши через грани в земли нашей, дерево бортне поделал и знамены свои наложил, што мне и сябрам моим од него есть кривда. Макар Геевич на то поведал: "Я за грани вашей земли дерева бортного не делал, если делал, теды у своей земли, а не вашей." И на тым шапку приставил на меня державцу з пяти коп грошей, же у своей земли борти делал. Тыхно Коркошка к его шапце свою приставил з яловицы. Я казал шапки поднять, маячи то, иж я то их право маю отложить и на грунте, где собе кривду Коркошка менил быть зложилем, то есть рок там на той земле выехать, на который же рок выехалем, то есть теражнейшего дня в дате вышейнаписанной, на который же рок они обыдве стороны постановилися на грунте передо мной на пяте грани, которые делили земли их. Тыхно Коркошка ведлуг жалобы повел по граням, почавши од дороги Ровницкой, през Жолонь вверх Кепури до сосны Ловдыковской, ветоши[сухая нескошенная трава - И. Л.] в той грани поведали быть, а од той ветоши дубрава уверх ку новорозсажаной сосны Бернатовича, в той грани поведали, а од той сосны до Кургана под Ольхова Волока, а од Кургана к Язвинам, а од Язвин до ветоши бортной Быковской, в той грани поведали быть, а од той ветоши до церковной ветоши Святого Николы Нагорного, в той грани поведаем быть; и Тыхно Коркошка вызнавал, иж те ветоши Быковкая и церковная грани Порубежницы ся, а од тых ветоши привели грань до леска, который слыне Рубежный лесок, за которыми ж ветошми Быковкая и церковная Тыхно Коркошка привел нас к сосне бортной нововыделанной и к соснам подписанным, и жаловал на Макара Геевича иж он те сосны в его земли за грани выделал. Макар Геевич к тому сознал, иж те сосны он сделал и затворил, "бо дей инших сябров тут дерево бортне, пописы с их знаменами есть, я на них грани собе выделал, и где сябры мое веспул [грань] земна будуча, которые той земна, поспол земна, ходя од князя Капусты а од пана Семена Кмиты на тей час, лепше грани одведем, которые сосны мое в нашой земле будучие за гранью, нежели они без панов своих, не смея граней земных заводить." И я в тым порозумевши, иж Макар Геевич сам вызнал, што ветош Быковская и церковная грани Порубежницы от та сосна выделана и иншие подписы под его знаменем за тым ветошем и Коркощиной земли, а сябров своих ни едного дерева под их знаменем в тым месте не вказал нам; знашли лем Тыхна Коркошку правого, и те сосны, што Макар выделал ему присудил и клейно свое наложить на той сосне велелим. А которое дерево неделане Макар у свои знамени пописал, з того казалем знамена его вытесать, где бы теж Макар Геевич на тен час як буде князь Капуста а пан Семен Кмита, а жебы с сябры своими инщих граней лепших неодвел далей опроч ветошми Быковская и церковная. А будет ли тен суд наш за правдивый мети, што Коркошка одвел, на он час Макар Геевич буде винен Тыхну Коркошце иметь мосць заплатить пять коп грошей, иж пришедши через грани в земле его сосны выделал, а иначе у свое знамена пописал был. И на том Тыхну Михайловичу Коркошце з его сябрами дал тен мой выпис з моя печатью. Дан в Овручим.

[/q]

У того листу подпису... прочитати не можна. Который же тот лист за поданьем и просьбою его милости подаючого и за моим урадовым принятьем до книг нынешних есть вписан.

См. ЦГИАК Фонд 2 Опись 1 Дело 16 Л. 119-119 об. №105 .https://sadowe.genealodzy.pl/i...amp;zoom=1
https://forum.vgd.ru/file.php?fid=1027489&key=76253969
https://forum.vgd.ru/file.php?fid=1027490&key=1353558572

[/q]