Левковские

[q]

Интересно, была ли случайной ошибка в Актах гродских киевских, сделанная рукой переписчика, или это осознанное отождествление Криштофа Кмитича как Криштофа Немирича?

[/q]

[q]

Жикгимонтъ, Божою милостью король Польский, великий князь Литовский, Русский, Прусский, Жомойтский, Мазовецкий и инших.
Били нам чоломъ бояре Овруцкие Федор, Андрей, а Совостинъ Григоревичи Невмирицкие о том, чтож дей державца Овруцкий пан Криштофъ Кмитич судил их очевисте с подданымъ нашимъ Уласом Микитичом о остров на имя Заесеничье именя их Невмирицкого, которого он подъ ними доставалъ, менуючи то быть своею отчизною. А они Федор з братомъ своимъ поведили иж дей тотъ островъ отецъ ихъ и они сами от колькадесят летъ спокойне держали и до сихъ часовъ, на што и листы перед ним покладали, за которыми то и тепер в моцы своей мают, а такъ он огледавши от ихъ листовъ при том острове земли Невмирицкое их зоставил и листъ свой судовый под печатью своею им дал, который они перед нами вказывали и били нам чолом абыхмо ихъ при листу судовом державцы Овруцкого Криштофа Кмитича зоставили. И то им листом нашим подтвердили, ино когды вже тому судъ был и справа, тот островъ им присужонъ. Мы того листу огледавши на чоломбитие ихъ то вчинили и при том суде державцы Овруцкого Криштофа Кмитича их зоставуем. Мают они тот островъ Заесеничье именя Невмирицкого зъ землями пашными и бортными и сеножатми на себе держати и вживати по тому якъ дед и отец ихъ держалъ водлугъ суду и листу его судового, и на то даем им сей нашъ листъ под нашею печатию. Писан в Берести под лето Божего нароженья 1544 месяца августа 8 дня. Индикта 2-го. Иван Горностай.

[/q]

[q]

Жикгимонт Август, Божою милостью король Польский, великий князь Литовский, Русский, Прусский, Мазовецкий, Жомойтский, Инфлянский и инших.

Ознаменуем тым листом нашим всим вобецъ и каждому зособна, кому того ведати албо слышати належит нышешнимъ и напотом будучим. Иж покладали перед нами и перед панами Радами нашими шляхетные Федор, Андрей, Совостянъ, Иван, а Степанъ Григоревичи Невмирицкие земяне наши земли Киевское листъ славное а святое памети короля Жикгимонта отца нашого, который листомъ своим потвердити им рачил именье ихъ отчизное остров на имя Заесеничье, которого поискивали под ними подданые наши овручские менуючы быти тот островъ отчизною своею. Который островъ справа за оказаньем слушным присудил им державца Овруцкий вроженый Криштофъ Кмитич, а на то ширей, а достаточней тотъ листъ короля Жикгимонта отца нашого под печатью целою в собе описуючи который слово от слова так ся в собе мает:

Жикгимонтъ, Божою милостью король Польский, великий князь Литовский, Русский, Прусский, Жомойтский, Мазовецкий и инших.
Били нам чоломъ бояре Овруцкие Федор а Андрей Гридковичи Невмирицкие о том, чтож дей державца Овруцкий пан Криштофъ Кмитич судил их очевисте с подданымъ нашимъ Власом Микитичом о остров на имя Заесеничье, которого они подъ ним поискивали, менуючи то быть своею отчизною. Аж тые Федор з братомъ своимъ поведили иж дей тотъ островъ отецъ ихъ и они сами от колькадесят летъ спокойне держали и до сихъ часовъ, на што и листы перед ним покладали, за которыми то и тепер в моцы своей мают, а такъ он огледавши от ихъ листовъ при том острове их зоставил и листъ свой судовый под печатью своею им дал, который они перед нами вказывали и били нам чолом абыхмо ихъ при листу судовом державцы Овруцкого Криштофа Кмитича заховали. И то им листом нашим подтвердили, ино когды вже тому судъ был и справа, тот островъ им присужонъ. Мы того листу огледавши на чоломбитие ихъ то вчинили и при том суде державцы Овруцкого Криштофа Кмитича их зоставуем. Мают они тот островъ Заесеничье зъ землями пашными и бортными и сеножатми на себе держати и вживати по тому якъ дед и отец ихъ держалъ водлугъ суду и листу его судового, и на то даем им сей нашъ листъ под нашею печатию. Писан в Берести под лето Божего нароженья 1544 месяца августа 8 дня. Индикта 2-го. Иван Горностай.

И били нам чолом преречоные Федор, Андрей, Совостянъ, Иван, а Степанъ Григоревичи Невмирицкие абы мы им тотъ листъ короля Жикгимонта отца нашого на тое именье островомъ названое Заесеничье им дати моцю нашою королевскою особливим листом привилеем нашим им подтвердили и умоцнили. Мы теды видячи дей слушную и годную тое которое они у нас просили, побачивши тот листъ короля Жикгимонта отца нашого добропорадные ни чом ненарушоные з власна воли они за тым листом вживали давного часу, так за славное и святое памети короля Жикгимонта отца нашого и за щастливого панованья нашого, яко власное отчизное своее в спокойном держаню и уживаню того именья своего названого Заесеничья были, не нарушаючи ни в чом подтверждение отца нашого короля Жикгимонта, тот лист его на тое именье и дание все яко в собе ести подтверждаем и умоцняем тем нашим привилеем. Мают они приречоные братия водлуг того листу отца нашого короля Жикгимонта и того нашого потверженья назавжды тое именье свое отчизное островъ названое Заесеничье, лежачое над рекою Словешною зъ землями пашными, з лесы, сеножатми, з дерево бортное, з бобровыми гонами, з речками, озерми и сады и всякими пожитками к нему прислухаючими, зо всим тым, так яко ся тое именье их островъ Заесеничье з давных часовъ сам в собе во всякихъ пожиткахъ и обыходахъ широкости и в границахъ своихъ мает, все такъ сполу, яко и зособна з своими детьми и потомками мети держати и их уживати вечне навеки през пренагабана и переказы кождого чолвека, а нам господару и Речи Посполитой с того именья своего службу земскую военную служити, они сами и потомки ихъ будути повинни, потому яко иншие земяне шляхта земли Киевское. А на свидетельство того всего розказалисмы у того листу нашого печать нашу Корунъную завесити. Дан в Варшаве на Сойме Валном Коронном дня 10 июля месяца року Божого нароженья 1570, а панованья нашого 41-го при бытности панов Радъ наших духовных и светскихъ Коруны Полское и Великого княжества Литовского на том сойме при нас будучихъ. Дан через руки велможного Валентого Дембинского з Дембян, канцлера Короны Полское. Valentego Debinskie (подпись).

[/q]

[q]

Жикгимонт Августъ Божою милостью король Польский, великий князь Литовский, Русский, Прусский, Мазовецкий, Жомойтский, Киевский, Волынский, Подляшский пан и дедичъ. Ознаменуем тым нашим Нинешнимъ писанием всим вобец и каждому зособна, кому того ведати ажбо слышати належит. Били нам чолом земяне наши княжества Киевъского Федор а Савостянъ Григоревичи Невмирицкие з братею своею, абыхмо мы им в том ласку нашу королевъскую показали, а им во властномъ именю их отчизном Невмирицкомъ в земли Киевской лежачомъ корчму мети и в ней мед, пиво и горелку шинковати позволили, яко жъ и Панове Рады наши на том Сойме Варшавъском при нас будучи, до нас за ними ся причинили, одно ижъ водлугъ Статуту прав посполитых и привилеевъ от продковъ нашихъ и от нас всим обывателем княжества Киевъского наданых, кождому шляхтичови во властъном именю своем отчизномъ волно вшелякие пожитки водлугъ воли и уподобасти своеи примножати и розширати. Мы теды, видечи того реч слушную, звласна будучи до того приведены просьбами Пановъ Рад наших, которые на Сойме за ними жедали, просьбе их ласкаве ся прихиливъши, з ласки нашое королевское то учинили: абыхмо преречонымъ земяном нашимъ Киевскимъ во власномъ именю их НевмирицкомЪ корчму волно отъ всяких поборовъ, капъщинъ нашихъ меть и в ней всяким питьем шинковать позволили есмо, яко и тымъ листомъ нинешнимъ нашим позволяем. Мают они сами, жоны, дети и потомкове ихъ корчму волно от всяких поборовъ и капъщинъ казеныхъ, всяких потребов, якимъ колвекъ обычаемъ названыхъ, в том именю своем Невмирицкомъ, лежачомъ в земли Киевской, держати и в ней пиво, мед и горилку шинковат и ее уживати водлугъ воли своее, през пренагабана и переказу каждого чоловека. А на сведецтво того всего розказали есмо до того листу нашого и печать нашу Коронную притиснути. Данъ в Варшаве на Сойме Валномъ Коронъномъ дня 30-го месяца августа року Божого нароженья 1570, а панованья нашого 41-го. Лист 33 об.https://forum.vgd.ru/file.php?fid=277572&key=676577518; Лист 34https://forum.vgd.ru/file.php?fid=277573&key=1534399639

[/q]

[q]

«Лист 208 Делъ о кгрунты межи бояры овруцкими Гринковичи а Сидковичи учиненный Лист 208 об. Жикгимонт Август. Ознаменуем тым листом нашим. Оповедал перед нами учтивый Тимофей Мойсеевич войт места нашого Овруцкаго именем приятелей своих повинных шляхетных Гриня а Оникия Сидковичов земян наших повету Овруцкого о том, иж тые земяне наши Гринь а Оникий Сидковичи з братию своею з двуроженых Федором, Андреем, Иваном, Сахном, а Степаном Гридковичи учинили постановлене и угоду о остров Максимовский на имя Слушов з обух сторон под тым обычаем. Иж тые вижей имены написанные Гридковичи и тым именам теж Лист 209 вижей написанным Сидковичом яко брати своей здвурожоной в том острови Максимовском Слушове во всём третью часть выделити и поступити мели и позволивши сами добровольне на то дельчим шляхетного Ивана Ласка подстаростого Овруцкого обрали и лист наш до него, абы их тым островом водлуг застановенья их поделил, одержали. То пак мененый Иван Ласко подстароста Овруцкий за листом нашим и добровольным позволеньем их з обух сторон рок завитой водлуг Статуту зложивиши на тот остров Максимовский на имя Слушов выехал и за нестаньем и невыеханьем тых земян наших Овруцких Лист 209 об. Федора, Андрея, Ивана, Сахна, Степана Гридковичов на тот остров Максимовский на имя Слушов лег, яко на року завитом и водлуг обовязку и добровольного позволенья их, застановеньем и пильностью их Гриня а Оникия Сидковичов тот остров взял Максимовский на имя Слушов, якожа в собе мает межи ними, выделяючи две части Гридковичам и третью часть братии их двурожоным Гриню а Оникию Сидковичам на вечность розделил и границы положил, и копцы окопал и лист свой дельчий под печатью своею, описавши на нем достаточне тые копцы и границы, Гриню а Оникию Сидковичу дал. Который же лист мененого Ивана Ласка подстаросты Овруцкого тот Лист 210 Тимофей Мойсеевич войт Овруцкий именем тых приятелей своих повинных Гриня а Оникия Сидковичов перед нами показывал, и просил нас абыхмо то ку ведомости нашой господарской припустивши тот лист дельчий подстаростего Овруцкого для уложеня и потверженя его до книг наших Канцелярских вписать и на то ему лист наш дать казали, и так мы того листу дельчого через войта Овруцкого перед нами покладаного огледавши и оповеданья его выслухавши и то ку ведомости нашой припустивши, казали есмо его слово от слова до книг Канцелярских и всей наш лист вписати, который так ся в собе мает: "Я Иван Ласко Лист 210 об. подстароста Овруцкий, иж што которое заштые земяне господарские Овруцкие "Можаровские"[17] Гринь а Оникий Сидковичи з братьею своею двурожоной Федором а Андреем, Иваном, Сахном а Степаном Гридковичи маючи при о выделении от них третьей части в острове Максимовском на имя Слушове иж што Сидковичи с тыми Гридковичи неоднокрот правуючися перед врадом господарским Овруцким взяли то собе были з розсудку его милости князя Андрея Тимофеевича Капусты каштеляна Брацлавского старосты Овруцкого пана моего на декрет перед судом господарским яко на семую суботу в року тепер идущом семдесятом, перед его милостью Лист 211 господарем становитися, где ж обоя сторона ставши на том року перед его милостю господарем и не вдаючися з собою вруч и до господаря его милости того не допускаючи, едналным обычаем вгоду з обу сторон межи собою приняли под тым способом иж тые Гридковичи тым Сидковичам в том острове Максимовском Слушове во всем третью часть мели выделити для чого ж они обыдве стороне позволившися и обравши собе мене на то дельчим, одержали лист господарскии до мене ж писаныи и под зарукою пятьмаста копами грошей хто бы то з них иначей вчиниты мел в кого его милость господарь наш милостивый пан до мене наменшого подданого своего писати казали рачил, Лист 211 об. приказуючи мне под ласкою своею господарскою абых я яко обраный от них самих з обу сторон, тот остров межи ними розделил и во всем тым Сидковичом третью часть того острова выделивши подал и всяки ж речи межи ними досмотрел, где ж я за тым розказаньем и писаньем господарским обославши тых Гридковичов ку выслуханю того листа господарского перед собою стат казал. Тогды з них, за тым обосланем моим Андрею а Ивану а Степану очевисте з Оникем Сидковичом передо мною ставши того ся листу господарского прислухали и чинячи досыт тому розказаню господарскому зложил есми рок водле Статуту Лист 212 завитои за шесть недел которыи рок обоя сторона принявши, позволили на тую там землю их ув остров Слушов вьихати и межи ними розделити, на который же рок припалый от мене им зложоный и од них самих обоих сторон добровольне принятый месяцу июля тридцатого дня в неделю на тую справу есми их там выезжал, а со мною в тот час были писар гродский замку господарского Овруцкого пан Григорий Масло, а земяне господарские пан Тихно Михайлович Коркошка, а пан Дмитр Васильевич Рапштинский, а бояре господарские Овруцкие Макар Геевич, а сын его Радивон, а Встин а Фен Нелеповичи Левковские, а Дмитр, а Янко Дьконовичи и инших Лист 212 об. людей добрых досыть было и тоде там приехавши обослал есми через возного Игната Чыжа тых Гридковичов Андрея, а Ивана, а Степана абы к тому делу на тот остров ехали и они ехати не хотели и я се в том справуючи водле росказаня господарского и теж водле принятья их того року обоих сторон выехавши там на тот грунт с теми людьми добрыми вижей помененными, которые со мною были, объехавши и осмотревши тот весь остров Максимовский на имя Слушов яко сам в собе мает, выделивши в нем на третью часть Гриню а Оникию Сидковичам што ся от нимнога нив и к тым нивам дубровки копцами и рубежами по деревьях Лист 213 ограничивши, то есть, почавши от болота Белоцкого в Долине копец закопан, которая Долина лежит на межи Слушова с Ровницкое Нивы, а от того копца правцом посредь тое Долины выходячи на пригорок к Ниве в Дубку рубежи рубаны и коло него копец закопан, а от того Дубка и копца также правцом через Ниву к дорозе Ровницкой и Хвои Росоха того рубежу и в другои Хвои от тое недалеко тут же подле дороги Ровницкое копец, а от того копца недалеко тою дорогою к городу едучи по правое руце другий копец, а того зас копца в Дубе Великом рубежи, а от Дуба через тую Лист 213 об. дорогу немного едучи правцом также у Великом Дубе рубежи, а того Дуба подле той же дороги Ровницкое копец и тут же подле того копца противко Долины в Дубку рубежи, а от того Дубка в другом Дубку в Долине рубежи, а от того вже Дубка правцом тою Долиною Слушовскою к тому болоту Белоцкому, вышей помененному, от которого первые копцы тых граней почал подел и поза тыми гранми Сидковичом в держание вечными часы, а потом от тул ехавши третьею часть селища Максимовщины им выделил от рубежа подданых господарских Белоцких, а против тое третее части своеи Сидковичи того селища мают тех третюю часть собе и дубровы робити Лист 214 также и Нивы старое Максимовское, што есть противко домов их за речкою Есенцом третюю часть Сидковичом выделивши, казали есмо грани положити в Сосне, которая есть под дворами Левковцов, а от той Сосны правцом межею теперь новоположоною аж в Лесок, в котором в Леску в Липе рубежи теж зарубаныи, а што ся тычет окром того выделеного Дубравы, Заросли лесов, Сеножати и Дерева бортного под знаменем Максимовским в том острови Максимовщизне вышей помененном на имя Слушов в его того третюю часть Гриню а Оникию Сидковичу а по них Лист 214 об. дети и потомки их от тых Гридковичов братью своеи двурожоных держати и уживати водлуг сего делу вечными часы мають. И на то есми тым знаменом господарским Гриню а Оникию Сидковичом дал сеи мои лист дельчий под моею печатью. Писан в Невмиричох под лето Божого нароженья тысяча пятсот симдесятого месяца июля тридцат первого дня, в понеделок." И на то есмо Гриню а Оникею Сидковичам земяном нашим повету Овруцкого дали сес наш лист з нашою печатью. Писан в Варшаве дня 14-го августа месяца от нароженя сына Божого тысяча пятсот семдесят Лист 215 первого, а панованья нашого року 23-го. Подпись руки велебнаго Ксендза подканцлера.»

[/q]

[q]

Года 1581, месяца октября 11 дня

На роках судовых земских Киевских, од дня св. Михала римского свята, в року теражидучим 1581, припадлых зачатых судовне ведле Статуту и Артикулов в нем описанных, одправованых перед нами Йосифом Немиричем, судьей, Богуфалом Павша, подсудком, урядниками земскими повету Киевского, постановившись очевисто, земяне земли Киевской, Иван Григоревич и Опанас Оникиевич Сидкевичи Невмирицкие, сами от себя и от братии своей роджоной младшей, оповедали и добровольне для записываню до книг земских вызнали: Иж дей то отцови наши и мы сами забрали были под себе земли соседов наших Федора, Андрея и Савостьяна Невмирицких, Заясенецкие и острова Слушовского и Максимовщизны, нив, сеножати, дубров, порослей и дерева бортного третья часть, за листами омыльными и неслушными, и видя дей есми быть держанье неслушне и непристойне, в соседское мешканье заятрене той земли Заясенецкой острова Слушовского, и Максимовщизны третью часть им есми назад воротили и поступили, на вечные часы, на что им и лист свой под печатьми своими и под печатьми и подписами их милостей панов зацных дали, чо щирей, а достаточней на тым листе есть описано и доложоно, и показавши перед нами, судом, тен лист, просили абы был читан и в книги справ судовых земских вписан, который слово од слова темы словы написан и так се в собе мает:

Я Иван Грегорович, я Опанас Оникиевич Сидковичи, земяне его королевской милости повету Киевского вызнаем и чиним явно тым нашим листом добровольным описом, сами од себе и од брати своей роджоной младшей, Ивана, Василя, а Семена Григоревичов, Максима, а Василя Оникиевичов Невмирицких, иж то были отцови наши и мы сами за листами неправдивыми, неслушными и омыльными у земян господарских повету Киевского, Федора, Андрея, Севостяна Григоревичов Невмирицких, в земле их власной отчизной и дедичной, прозываемой Заясенецкой в острове Слушовском у Максимовщизне лежачей, в повете Киевском, третья часть нив, сеножатей, дерева бортного, дубрав, зарослей... на себя забрали, и границы были зарубали, а дерева бортного в той земли Заясенецкой на Слушове в Максимовщизне и свое знамя... были нарубали, и под себе были забрали, на то и листы господарские и урядовые и декрета компромиссарского судового посправовали и отримали. И видя есмы быть те держанье наше неслушне и неправдиве, а видя то мешканье заятрене и не хотячи мы з тыми соседами нашими Федором, Андреем, а Савостьяном Невмирицкими в то ся заводить и в те земли их отчизные и дедичные Заясенецкая и Слушов и в Максимовщизна вступовать, и по-старому в соседстве ласкаво мешкать, те земли вышмененная Заясеницкая на Слушове и Максимовщизне третья часть, что мы были под себе забрали, нивы, сеножати, поля, дубровы, заросли... Федору, Андрею и Савостьяну Невмержицким назад отдали и вротили, в моч и держанье подали и поступили през возного и шляхты. И тым листом нашим вращаем и на вечные часы вырекаем, и вступа жодного там иметь не хочем, и те все справы наши на те части належачие, листы господарские и урядовые и компромиссарские людей полюбовных... обычаем справеня и позваня, листы им возвратить и скасовать маем у вечными часы умовились, и знаменя свого в той земли и островах вышпомененных навечно вырекаем, мы сами, жоны, дети и потомки наши. А если бы мы им тых листов, яко выжей помененны, не отдали и не показовали... втеды таковы листы никоторой мочи меть ку праву приймованы быть не мают, бо мы их тым листом нашим на вечные часы уморили. И где бы они од нас и од кого колвек до таковых листов были позваны, тоды и за таковыми позовами не повинни становитись и их послушными быть, и иж од того дня даты, нижей в том листе нашим написанной, мы сами и братья наша младшая, жоны, дети и потомки наши в ту третью часть земли Заясенецкой острова Слушова и Максимовщизны вступовать и никоторых переказов держаню им самим, жонам, детям и потомкам их мы сами, жоны, дети и потомки наши чинить, ку праву позывать, ку шкоде и накладам проводить не маем, и мочны будем мы вечными и навеки непорушными часы. А если бы мы сами, братия наша младшая, жоны, дети и потомки пребачивши того листу добровольного опису нашего им самим, жонам, детям и потомкам их з той третьей части земли Заясенецкой в острове Слушове и Максимовщизне, и якись колвек переказы в держаню делать, або спокойного держаня вибить ку праву позвать и ку шкоде и накладам приводить мели, тоды мы у кожды таковы кто бы то учинит мел повинен буде заруки заплатить на суд земский Киевский 200 коп грошей литовских, а стороне ображоной другие 200 коп грошей литовских им самим и потомкам их, ку тему шкоды и наклады кром вселякого права доводу и присяги, тилько на голе реченье слова их самих и потомков их, заплатить и добре наградить мают и заплативши все заруки, шкоды и наклады наградивши, по речи той наш лист в кождого права при зупольной моци в тых артыкулах и обвязанях целое а ненарушоное хованье мая, якож и тен лист добровольный, описанный заразем того ж часу на роках земских Киевских, на замку Овруцким ставши, очевисто перед судом земским вызнали и до книг земских уписать дали. Ино я, Иван Григоревич, а я Опанас Оникиевич Сидковичи Невмирицкие, Федору, Андрею, а Савостьяну Невмирицким дали тот наш лист, до которого на твердость и на сведецтво очевисто просили мы о приложении печатей их милостей зацных панов, его милость пана Щасного Харлинского, подкоморего земли Киевской, пана Матфея Йосиповича, судича земского Киевского, а пана Александра Федоровича Тыши, что их милости за очевиста и устна просьба наша взяли печати и подписи свои приложить рачили, яко же и мы при печатях их милостей и свои власне печати приложили.

Писан в Овручу. Лета по нароженью Сына божего 1581, месяца октября 11 дня. Щасный Харлинский, подкоморий земли Киевской, власна рука. Матфей Немирич, рука власна. Александр Федорович Тыша Быковский, рука власна.https://forum.vgd.ru/1231/1829...iew&o=

[/q]

[q]

Жыкгимонт III Божою милостью король польский, великий князь литовский и прочее ознаменуем тым листом нашим всем вобец и каждому зособна кому колвек то ведати належит, иж показано нам через певных Панов Рад и урядников наших именем шляхетных Максима, Опанаса, Василия и Совостяна Оникиевичов, а Ивана, Василия, Семена, другого Ивана Гриневичов Сидковичов, а Ивана Юрьевича Невмирицких, земян наших земли Киевской два листа, один певных компромисаров албо судей полюбовных меж тые земяне наши яко сяброве, маючи межи собою зайствия розницы и поступки у права, а тоз стороны именья своего спольного Заясенецкого и острова Максимовского на имя Слушова и иншие речи перед тыми компромисарми росправу мели и не припускаючи на вырок их давно ещё в року 1578 поедналися были: а другий лист тых же некоторых сябров, кгды знову над тую угоду около тых же добр они межи собою были запозвалися, а не вступаючи в право в року 1582 водлуг першое ся угоды поеднали, которых дей добр своих шляхетных дедичных, яко перед сим з стародавна продкове их так и они по продках своих и по той остатней угоде аж досель в спокойном держаню и уживаню суть без всякого принагабанья посторонного, просили нас абыхмо тое право и угоду их нашим листом подтвердили, а так мы тых листов огледавши и выслухавши, а выдечи быти целые с печатями наповненные, рассказали есмо их от слова до слова в сей наш лист писати и так в собе мают:

Книга РМ 4 РГАДА, фонд 389, опись 1, Дело 194:
51). 20.II.1578. Варшава. Приняте року межи певными особами земяны киевъскими о розницы их на компромисары, Листы 224 - 225 об.
Мы судьи полюбовные: я Иван Солтан судья гродский Киевский, а Павел Солтан, а Андрей Синкгур, иж то в року тепер идучом по нароженью сына Божого 1578 месяца февраля 20 дня, земенин повету Киевского Офанас Невмирицкий сам от себя и от всей братии своей на имя Максима, Васька Оникиевичов, Ивана и другого Ивана, Василя а Семена Гринковичов Сидковичов Невмирицких на Сейме Вальном Коронном в Варшаве ставши очевисто перед его королевскою милостью у книг канцелярии господарское оповедал и добровольне вызнавал, иж дей што которые то кривды и долеглости земяне повету Киевского суседи наши Федор а Андрей, Совостян Гридковичи Невмирицкие менили собе от нас кривды быти через границу звечистую в кгрунте своем Заясенецком, о подрание бчол и потесание и вызжение знаков в дереве бортном и забранье нив, сеножатей, дубров, дерева бортного, садов и прочих, и о выбытье с того грунту Заясенецкого спокойного держания и иншие шкоды свое. И на то вышемененый Афанас, яко сам от себе, так от брати своей вышепомененное не хотячи о то далей с тыми суседи своими вышмененными Гридковичами заводити и до праву позывати, восполок с тыми суседы своими Федором, Андреем и Совостяном Гридковичами Невмирицкими тые вси кривды, долегливости, шкоды и розницы свои взяли нас собе с обудвух сторон, перед его королевскою милостью на то судьями, на што и лист его королевское милости того добровольного сознания своего перед нами покладали, а так мы огледавши тот лист его королевской милости добровольного их обовязку там на тот рок в листех его королевской милости описаных в року теперь идучом 1578 по Велицедни святе прошлом у двух неделях в неделю на тот кгрунт, где собе Андрей, Федор, Совостян Гридковичи Невмирицкие менили от Афанаса и от братьев его Оникиевичов Ивана, Василя, Семена Гриневичов Сидковичов Невмирицких кривду быти выехали, где они обое сторона Федор, Андрей, Совостян Гридковичи Невмиржицкие так теж и Сидковичи вси вышемененные Невмирицкие, ставши перед нами очевисте на кгрунте против домов своих, где они мешкают за речкою Ясенцем, давши се нам в моць ведле обовязку своего жаловались перед нами Федор, Андрей и Совостян Гридковичи Невмирицкие на тых суседов своих вышпомененных Сидковичов Невмирицких иж они дей не ведаючи в который обычай перешедши через границу речку се тую Ясенец, моцно кгвалтом нас от того грунту нашого Заясенецкого выгнали, яко поля, так селище, дерево бортное и сеножати в нас поотнимали и бчолы наши по дереву бортному около сот роев подрали, а они дей в том острове Заясенецком з нами ниякого вступу як в ниви так и в сеножати и дереви бортном не мели и не мают, и положили перед нами лист на папери писаный славное памяти старого короля его милости Жыкгимонта подтверждение с подписью руки небощика пана Горностая, писаря его королевской милости на остров Заясенече и привилей на пергаменте славное памяти небощика короля Жыкгимонта Августа на тоеж Заясениче. И тот Офанас с братьею своею Оникиевичи, так же Иван с братьею своею Гриневичи Сидковичи нам одповедали иж дей што они перед Вашою милостью на нас жалуют и поведают, якобы тот остров и кгрунт мает быти Заясенецкий и якобыхмо мы тут за ними вступу жадного не мели. Ино мы то поведаем иж то не есть кгрунт, а ни остров Заясенецкий, але то есть остров Максимовщина на имя Слушов, в котором мы острове тут де Ваша милость стоите маем от них третью часть, яко в нивах, в синожатях, в дереве бортном и во всем, якосе оный остров в собе мает через суд его милости пана Йосифа Михайловича Халецкого старосты Овруцкого, а Заясенецкий остров не то, але отселя у мили есть остров Заясенецкий, и не одним им и нам там в том острове Заясенецком, але инших судеревников и сябров немало, которые с нами в том вышмененном острове судерев мают, бо они от нас особливого кгрунту нигде не мают а мы от них, але все сполечне, бо мы собе братия повинная, и положили перед нами на тот остров Максимовщину на имя Слушов лист судовый небощика пана Йосифа Михайловича Халецкого старосты Овруцкого, в котором листе Халецкого пишет иж оные Сидковичи и Гридковичи Невмирицкие с сябром своим Селуяном Сидоровичом Невмирицким а иже с сынами его право содного вели и им от того Селуяна на тот остров Максимовщину на имя Слушов восполок присудил, и поведили оные Сидковичи перед нами, иж дей мы за оным судом пана Халецкого в том острове части своее спокойно уживали аж до сих часов, кгде оные почали были тут нам кривду чинити, и мы дей на них на враде его королевской милости Овруцком перед его милостью князем Андреем Тимофеевичем Капустою старостою Овруцким жаловали и оповедали. Его милость князь Капуста с жалобою нашою нас обудвох сторон за позволеньем нашим отослал нас до его королевской милости, где они обоя сторона яко Гридковичи, тако и Сидковичи у двору его королевской милости у короля его милости Августа будучи, ставши перед его королевскою милостью очевисте, не вдаючися в жадную речь приятельским обычаем угоду з собою приняли под тым способом иж тые Гридковичи поступили тым Сидковичам, в том острове Максимовщине на имя Слушове во всем третью часть, як в нивах, сеножатях, дереве бортном выделити и им подати, изволившысе межи собою они обрали себе дельчим пана Ивана Ласка подстаростего Овруцкого, господар его милость водле того позволенья их лист свой господарский до пана Ивана Ласка писати росказат рачил, розказуючи ему абы тым Сидковичам от тых Гридковичов в том острове Максимовском у Слушове третью часть во всем, так в нивах, сеножатях и в дереве бортном выделил и в моць в держане подал. И тот лист дельчий пана Ласка перед нами покладали, к тому теж еще на тот дел пана Ивана Ласковъ и лист его милости короля Августа подтвержене перед нами покладали и доводили того, же то не есть остров Заясенецкий, одно Максимовщина на имя Слушов, водле обычаю права посполитого и статуту земского ставили довод, с которым доводом своим сами присягою своею готовы были того потвердити. Мы питали тых вышмененных Андрея, Федора, Совостяна Невмирицких естли жебы еще на то мели якие иншие листы твердости и довод на тот остров, если бы то был остров Заясенецкий, а не Слушов. Они поведили, што есмо мели, то ж то перед Вашою милостью показали, а большей того, яко листов, так и доводов на то не маем, так теж и тот остров не есть Максимовщина на имя Слушов, але Заясенецкий остров. И питали есмо их где ж Максимовщина на имя Слушов, а они Гридковичи Федор, Андрей, а Совостян Невмирицкий [отвечали]: не ведаем де где есть. Мы выслухавши жалобы и отпоров их, беручи собе на розмышлене и казали им убудвом сторонам уступити и кгды в то есмо намовившись и зрозумевши с оных листов обудвух сторон, которые были перед нами положены иж вже есмо хотели вырок учинити. А так они, пришедши перед нас обоя сторона поведали иж мы по доброй воли своей с собою есмо о том погодили, и тут в том острове де Ваша милость теперь стоите в Максимовщине на имя Слушове третью часть во всем, яко в нивах, в сеножатях и в дубровах поступаем Сидковичам, и яко перед тым они знали, так и теперь своей третей части вживати мают; так теж оные вышей мененые Сидковичи також добровольне перед нами поведали иж дей мы того селища Максимовского против дворов наших над речкою Ясенцем, которое нам пан Ласко выделил был подле поля тых Гридковичов тут же об межу з нивою их им Гридковичом поступуем и в держане даем вечными часы до которого селища так до тое нивы Гридковичов, што до того селища межею прилегла, до всее жадное вже части мети не будем, и не маем мы сами и потомки наши вечными часы. И вжо Гридковичи Федор, Андрей а Совостян оного вышмененного селища и нивы уже в дел не повинни ставити и за тым селищом и нивою тым вышей речонным Сидковичом во всем третью часть выделити, мают так у дубровах, в нивах, в сеножатях, а что ся дотычет о дерево бортное, о то они были переписали ново в земли бортной Заясенецкой от того Слушова в мили, того се зрекаем вечными часы поступаем Гридковичам одно мает под старым знаменем своим, которым есмо с веков хожывали, держати и уживати, что в острове Заясенецком, як в Максимовщине Слушове. А штося дотычет подранные пчолы 240 роев, которых Гридковичи вышеймененные на тых Сидковичох вышейречоных же правом перед нами искали, на то Гридковичи на тое подрание пчолы слушного доводу водлуг права не показали. Мы оных Сидковичов от тое всее шкоды 240 роев правыми вчинили, который мы суд свой выписавши, достаточне на сем листе нашом и добровольной их угоде, слышачи што они не вдаючи до выроку нашого доброволне с собою се приятельски погодили. Мы водлуг добровольного их вызнанья и угоды оных Сидковичов вышейречоных всих заховали в том острове Максимовщине на имя Слушове на третей части так в нивах, в сеножатях, в дубровах и во всяких ужитках, мают оные вышречонные Сидковичи вси в оном острове Максимовщине на имя Слушове третью часть мети и уживати со всим на все якося вышпомененные они сами и потомкове их вечными часы. А в тот час з ними на той справе были его милость пан Петр Солтан, пан Антон Гапонович, врадник Олевский и Горловский. А на лепшую твердость тым земянам повету Киевского вышречоным Сидковичам всим дали суду своего сеи наш лист под печатьми нашими с подписами власных рук наших. Писан у Невмиричах под лето Божого нароженья 1578 месяца апреля 17 дня. Иван Солтан судья кгродский Киевский власна рука. Павел Солтан власною рукою. Андрей Синкгур власною рукою.

Я Федор, я Совостян Григоревичи, я Петр Федорович возный повету Киевского, я Матфей Андреевич Невмирицкии, земяне господарские повету Киевского, вызнаваем сами на себе сим листом нашим добровольным описом кому бы то была та потреба ведати либо чтучи его слышати, теперь и на потом будучим иж то ясно были отсужаны от соседов своих Опанаса, а Ивана и братьи Оникиевичов и Гриневичов Невмерицких земян господарских повету Киевского лист под печатьми их и под печатьми их милости пана Щасного Харлинского подкоморого земли Киевское, пана Матфея Есифовича Немирича, а пан Александра Тыши на кгрунт остров Слушов и Максимовщину, лежачий кгрунтом своим в повете Киевском от суседов своих Опанаса, Максима Оникиевичов, от Ивана и другого Ивана, а Васка Грыневичов Невмирицких, который лист того поданя и поступеня острова вышпомененного был до книг земских Киевских в року прошлом 1581 на роках земских свята Михайла римского в Овручом сужоных, записал от которых книг земских и выпис на то от суду земского был выдан, так теж лист увяжчий возного Семена Александровича Мочульского и лист еднальный за которыми листами и держали были есмо тот остров Максимовщину и Слушов, а о который остров позвалиса есмо были з обудву сторон позвы кгродскии перед суд кгродский Киевский в року тепер идучом 1582 месяца июня 13 дня. Иже мы с обудву сторон, не вдаючися за тыми позвы жодное право с тыми суседи своими Опанасом, Максимом, Иваном и другим Иваном а Васком Невмирицкими приняли есмо промеж себе приятельским обычаем таковую згоду, иж опяти по старому тот остров Максимовщину и Слушов с нивами и сеножатьми, с деревом бортным новинем под знаменем их начать третью прислухаючи им зась вернули, который же остров мают вже свою третью часть с нивами и синокосами в себе держати и уживати ведле листов своих старых и листов компромисарских и с того ся вже вечне вырекаем и ту всю оправу свою от мала до велика, што есмо колвек были от них одержаны в року 1581 на тот остров вышмененный показали и где бы колвек до книг было тую справу, яко земских, так и гродских, бо ведено тогда такое вписыванье, яко жодной моци мати не будет вечными часы а если сих мели якую трудность албо переказу в том чинити острове пробачивши сей наш лист тоди повинна будет стороне ображоной 100 коп грошей заплатити, а на замок Киевский 50 коп грошей, а заплативши тые заруки преж сес лист наш в кождого права захован быти мает и на то есмо суседам нашим дали сей наш лист добровольный под печатьми нашими. К тому за чоломбитьем и устною просьбою нашою пак милость панове земяне земли Киевской пан Андрей Синкгур, пан Ждан Дедко Трипольский, пан Богуш Гулькович Глебовский, а возный повету Киевского Михайло Кирикович Выговский, а Терех Колъчиковский печати свои восполом з нашими печатьми приложить рачили. Писан в Киеве лета по нароженью сына Божого 1582 месяца июня 23 дня. А прихиляючися они до конфирмации посполитое головное счастливой коронации нашой в Кракове учиненное и уважаючи просьбу от приречоных земян наших Невмирицких вслушне учиненную в рок описаное правом угоду их на грунты Заясенецкие и остров Максимовский на имя Слушов и на всякие належности и пожитки прислухаючими со всими артыкулами в тых оных листах описанными звлаща если они были и суть того в спокойном держаню и уживаню а не есть то против праву потвержаем и умоцаем тым листом нашим оставуючи их при том всем водле права тых листов и угоды их а для лучшей веры до того листу печать нашу Коронную приложити есмо росказали. Писан в Варшаве на Сейме Вальном Коронном дня 28-го месяца декабря року от нароженья Христова 1590, а королеваня нашого року 3-го.

[/q]

[q]

Жикгимонт третий.
Ознаменуемъ тым листом нашимъ всим вобец и каждому зособна кому того ведати належит нынешним и на потомъ будучимъ. Показывали перед нами земяне наши земли Киевъское шляхетные Петръ, Онисий а Иван Федоровичъ, Тимофей Совостянович, а Матфей Андреевич Невмирицкие листы два его кор. милости славное и святое памети Жикгимонта Августа вуя нашого, один потвержене на имене ихъ отчизное Невмирицъкое и остров на ймя Заясеничье, а другий данина на корчъму волное шинкованье медом, пивом и горилкою в том именю их Невмирицкомъ, покладали тежъ при том листъ судовый Мартина Кгаштолътовича наместника Киевъского, которымъ присудилъ землю Невмирицкую Микуле, продку их, яко то щирей и достаточней в тых листахъ его королевской милости и в листе судовомъ Кгаштолътовъскомъ описано и доложоно есть, которых мы огледавши до книгъ Канцелярии нашое и в тот лист нашъ слово в слово вписати казали, и так ся в собе мает:

Жикгимонт Август, Божою милостью король Польский, великий князь Литовский, Русский, Прусский, Мазовецкий, Жомойтский, Инфлянский и инших.

Ознаменуем тым листом нашим всим вобецъ и каждому зособна, кому того ведати албо слышати належит нышешнимъ и напотом будучим. Иж покладали перед нами и перед панами Радами нашими шляхетные Федор, Андрей, Совостянъ, Иван, а Степанъ Григоревичи Невмирицкие земяне наши земли Киевское листъ славное а святое памети короля Жикгимонта отца нашого, который листомъ своим потвердити им рачил именье ихъ Невмирицкое отчизное и остров на имя Заесеничье, которого доставали под ними подданые наши овручские менуючы быти тот островъ отчизною своею. Который островъ справа за оказаньем слушным присудил им державца Овруцкий вроженый Криштофъ Кмитич, а на то ширей, а достаточней тотъ листъ короля Жикгимонта отца нашого под печатью целою в собе описуючи который слово от слова так ся в собе мает:

Жикгимонтъ, Божою милостью король Польский, великий князь Литовский, Русский, Прусский, Жомойтский, Мазовецкий и инших.
Били нам чоломъ бояре Овруцкие Федор, Андрей, а Совостинъ Григоревичи Невмирицкие о том, чтож дей державца Овруцкий пан Криштофъ Кмитич судил их очевисте с подданымъ нашимъ Уласом Микитичом о остров на имя Заесеничье именя их Невмирицкого, которого он подъ ними доставалъ, менуючи то быть своею отчизною. А они Федор з братомъ своимъ поведили иж дей тотъ островъ отецъ ихъ и они сами от колькадесят летъ спокойне держали и до сихъ часовъ, на што и листы перед ним покладали, за которыми то и тепер в моцы своей мают, а такъ он огледавши от ихъ листовъ при том острове земли Невмирицкое их зоставил и листъ свой судовый под печатью своею им дал, который они перед нами вказывали и били нам чолом абыхмо ихъ при листу судовом державцы Овруцкого Криштофа Кмитича зоставили. И то им листом нашим подтвердили, ино когды вже тому судъ был и справа, тот островъ им присужонъ. Мы того листу огледавши на чоломбитие ихъ то вчинили и при том суде державцы Овруцкого Криштофа Кмитича их зоставуем. Мают они тот островъ Заесеничье именя Невмирицкого зъ землями пашными и бортными и сеножатми на себе держати и вживати по тому якъ дед и отец ихъ держалъ водлугъ суду и листу его судового, и на то даем им сей нашъ листъ под нашею печатию. Писан в Берести под лето Божего нароженья 1544 месяца августа 8 дня. Индикта 2-го. Иван Горностай.

И били нам чолом преречоные Федор, Андрей, Совостянъ, Иван, а Степанъ Григоревичи Невмирицкие абы мы им тотъ листъ короля Жикгимонта отца нашого на тое именье островомъ названое Заесеничье им дати моцю нашою королевскою особливим листом привилеем нашим им подтвердили и умоцнили. Мы теды видячи дей слушную и годную тое которое они у нас просили, побачивши тот листъ короля Жикгимонта отца нашого добропорадные ни чом ненарушоные з власна воли они за тым листом вживали давного часу, так за славное и святое памети короля Жикгимонта отца нашого и за щастливого панованья нашого, яко власное отчизное своее в спокойном держаню и уживаню того именья своего Невмирицкого острова Заясенецкого были, не нарушаючи ни в чом подтверждение отца нашого короля Жикгимонта, тот лист его на тое именье и дание все яко в собе ести подтверждаем и умоцняем тем нашим привилеем. Мают они приречоные братия водлуг того листу отца нашого короля Жикгимонта и того нашого потверженья назавжды тое именье свое отчизное Невмирицкое островъ названое Заясеничье, лежачое над рекою Словешною и обапол реки Словешни зъ землями пашными, з лесы, сеножатми, з дерево бортное, з бобровыми гонами, з речками, озерми и сады и всякими пожитками к нему прислухаючими, зо всим тым, так яко ся тое именье з давных часовъ сам в собе во всякихъ пожиткахъ и обыходахъ широкости и в границахъ своихъ мает, все такъ сполу, яко и зособна з своими детьми и потомками мети держати и их уживати вечне навеки през пренагабана и переказы кождого чолвека, а нам господару и Речи Посполитой с того именья своего службу земскую военную служити, они сами и потомки ихъ будути повинни, потому яко иншие земяне шляхта земли Киевское. А на свидетельство того всего розказалисмы у того листу нашого печать нашу Корунъную завесити. Дан в Варшаве на Сойме Валном Коронном дня 10 июля месяца року Божого нароженья 1570, а панованья нашого 41-го при бытности панов Радъ наших духовных и светскихъ Коруны Полское и Великого княжества Литовского на том сойме при нас будучихъ. Дан через руки велможного Валентого Дембинского з Дембян, канцлера Короны Полское.

Жикгимонт Августъ Божою милостью король Польский, великий князь Литовский, Русский, Прусский, Мазовецкий, Жомойтский, Киевский, Волынский, Подляшский пан и дедичъ. Ознаменуем тым нашим Нинешнимъ писанием всим вобец и каждому зособна, кому того ведати ажбо слышати належит. Били нам чолом земяне наши княжества Киевъского Федор а Савостянъ Григоревичи Невмирицкие з братею своею, абыхмо мы им в том ласку нашу королевъскую показали, а им во властномъ именю их отчизном Невмирицкомъ в земли Киевской лежачомъ корчму мети и в ней мед, пиво и горелку шинковати позволили, яко жъ и Панове Рады наши на том Сойме Варшавъском при нас будучи, до нас за ними ся причинили, одно ижъ водлугъ Статуту прав посполитых и привилеевъ от продковъ нашихъ и от нас всим обывателем княжества Киевъского наданых, кождому шляхтичови во властъном именю своем отчизномъ волно вшелякие пожитки водлугъ воли и уподобасти своеи примножати и розширати. Мы теды, видечи того реч слушную, звласна будучи до того приведены просьбами Пановъ Рад наших, которые на Сойме за ними жедали, просьбе их ласкаве ся прихиливъши, з ласки нашое королевское то учинили: абыхмо преречонымъ земяном нашимъ Киевскимъ во власномъ именю их НевмирицкомЪ корчму волно отъ всяких поборовъ, капъщинъ нашихъ меть и в ней всяким питьем шинковать позволили есмо, яко и тымъ листомъ нинешнимъ нашим позволяем. Мают они сами, жоны, дети и потомкове ихъ корчму волно от всяких поборовъ и капъщинъ казеныхъ, всяких потребов, якимъ колвекъ обычаемъ названыхъ, в том именю своем Невмирицкомъ, лежачомъ в земли Киевской, держати и в ней пиво, мед и горилку шинковат и ее уживати водлугъ воли своее, през пренагабана и переказу каждого чоловека. А на сведецтво того всего розказали есмо до того листу нашого и печать нашу Коронную притиснути. Данъ в Варшаве на Сойме Валномъ Коронъномъ дня 10 месяца июня року Божого нароженья 1570, а панованья нашого 41-го. Данъ през руку Валентого Дембинъского з Дембянъ, королевства Полского канцлера.

Я, Мартин Кгаштолътовичъ, наместникъ Киевъский, маршалокъ земский, положилъ передо мною жалобу очевисто земенин Киевъский Лазар Скобейковичъ на земенина Киевского жъ, на Микулу О[с]ташъковича Невмирицкого, што тый Микуло отчизну мою держишъ Невмирицкую, не ведаю для чого. Микула Лазару мовилъ, я тую землю держу по продку своем Невмире за великого князя Витовъта, штожъ тамошние люди Вруцъкие Мишко а Грицко Ровъбовъские мовили, што то есть земля Микулина, Невмирицкая. Ино, я тую землю Невмирицкую присудилъ Микуле со всими пожитками, которые в той земли ест, какъ тые люди Вруцкие передо мною сознали, и на то есми ему далъ сес мой листъ за моею печатю. Писан у Киеве апреля 30 дня, индикта 7-го.

А такъ мы просьбе преречоной, яко слушной ласкаво ся прихиляючи, листы помененные, яко не где праву противные, вси яко ся в собе мают и во всихъ их артикулах и кондициях потвердити и умыслили есмо яко ж потвержаемъ и умоцнаемъ тыи нинешнимъ листомъ нашимъ часы вечными, наказуючи хотечи так мати абы тот листъ нашъ на кождомъ месцу и у вшелякого права был таковое моци и важности, яко тые привилеи в собе мают. А на сведецтво для лепъшое твердости сей лист рукою нашою подписавши и печать нашу Коронную привесити есмо казали. Писан в Варшаве на Сойме Валномъ Коронъномъ лета Божого нароженья 1591 месяца января 8-го дня, а королевства нашого року 4-го. Sigismundus Rex. Flor. Oliesko.https://forum.vgd.ru/1231/1829...iew&o=

[/q]

[q]

имеет ли отношение "ziemie Piętkowską" к роду Aleksandra Piątkowskiego (Александра Александровича "з Горая" (Чурило) ?

[/q]

[q]

РГАДА, фонд 389, опись 1, Дело 192:
10.VII.1570. Варшава. Потверженье земяномъ земли Киевъское Федору, Анъдрею, Совостяну, Ивану а Степану Григоревичомъ Невмирицкимъ на имене их отчизное, островъ, названыи Заесеничъе, над рекою Словешною, Листы 22 об. - 24

Жикгимонт Август, Божою милостью король Польский, великий князь Литовский, Русский, Прусский, Мазовецкий, Жомойтский, Инфлянский и инших.

Ознаменуем тым листом нашим всим вобецъ и каждому зособна, кому того ведати албо слышати належит нышешнимъ и напотом будучим. Иж покладали перед нами и перед панами Радами нашими шляхетные Федор, Андрей, Совостянъ, Иван, а Степанъ Григоревичи Невмирицкие земяне наши земли Киевское листъ славное а святое памети короля Жикгимонта отца нашого, который листомъ своим потвердити им рачил именье ихъ отчизное остров на имя Заесеничье, которого поискивали под ними подданые наши овручские менуючы быти тот островъ отчизною своею. Который островъ справа за оказаньем слушным присудил им державца Овруцкий вроженый Криштофъ Кмитич, а на то ширей, а достаточней тотъ листъ короля Жикгимонта отца нашого под печатью целою в собе описуючи который слово от слова так ся в собе мает:

Жикгимонтъ, Божою милостью король Польский, великий князь Литовский, Русский, Прусский, Жомойтский, Мазовецкий и инших.
Били нам чоломъ бояре Овруцкие Федор а Андрей Гридковичи Невмирицкие о том, чтож дей державца Овруцкий пан Криштофъ Кмитич судил их очевисте с подданымъ нашимъ Власом Микитичом о остров на имя Заесеничье, которого они подъ ним поискивали, менуючи то быть своею отчизною. Аж тые Федор з братомъ своимъ поведили иж дей тотъ островъ отецъ ихъ и они сами от колькадесят летъ спокойне держали и до сихъ часовъ, на што и листы перед ним покладали, за которыми то и тепер в моцы своей мают, а такъ он огледавши от ихъ листовъ при том острове их зоставил и листъ свой судовый под печатью своею им дал, который они перед нами вказывали и били нам чолом абыхмо ихъ при листу судовом державцы Овруцкого Криштофа Кмитича заховали. И то им листом нашим подтвердили, ино когды вже тому судъ был и справа, тот островъ им присужонъ. Мы того листу огледавши на чоломбитие ихъ то вчинили и при том суде державцы Овруцкого Криштофа Кмитича их зоставуем. Мают они тот островъ Заесеничье зъ землями пашными и бортными и сеножатми на себе держати и вживати по тому якъ дед и отец ихъ держалъ водлугъ суду и листу его судового, и на то даем им сей нашъ листъ под нашею печатию. Писан в Берести под лето Божего нароженья 1544 месяца августа 8 дня. Индикта 2-го. Иван Горностай.

И били нам чолом преречоные Федор, Андрей, Совостянъ, Иван, а Степанъ Григоревичи Невмирицкие абы мы им тотъ листъ короля Жикгимонта отца нашого на тое именье островомъ названое Заесеничье им дати моцю нашою королевскою особливим листом привилеем нашим им подтвердили и умоцнили. Мы теды видячи дей слушную и годную тое которое они у нас просили, побачивши тот листъ короля Жикгимонта отца нашого добропорадные ни чом ненарушоные з власна воли они за тым листом вживали давного часу, так за славное и святое памети короля Жикгимонта отца нашого и за щастливого панованья нашого, яко власное отчизное своее в спокойном держаню и уживаню того именья своего названого Заесеничья были, не нарушаючи ни в чом подтверждение отца нашого короля Жикгимонта, тот лист его на тое именье и дание все яко в собе ести подтверждаем и умоцняем тем нашим привилеем. Мают они приречоные братия водлуг того листу отца нашого короля Жикгимонта и того нашого потверженья назавжды тое именье свое отчизное островъ названое Заесеничье, лежачое над рекою Словешною зъ землями пашными, з лесы, сеножатми, з дерево бортное, з бобровыми гонами, з речками, озерми и сады и всякими пожитками к нему прислухаючими, зо всим тым, так яко ся тое именье их островъ Заесеничье з давных часовъ сам в собе во всякихъ пожиткахъ и обыходахъ широкости и в границахъ своихъ мает, все такъ сполу, яко и зособна з своими детьми и потомками мети держати и их уживати вечне навеки през пренагабана и переказы кождого чолвека, а нам господару и Речи Посполитой с того именья своего службу земскую военную служити, они сами и потомки ихъ будути повинни, потому яко иншие земяне шляхта земли Киевское. А на свидетельство того всего розказалисмы у того листу нашого печать нашу Корунъную завесити. Дан в Варшаве на Сойме Валном Коронном дня 10 июля месяца року Божого нароженья 1570, а панованья нашого 41-го при бытности панов Радъ наших духовных и светскихъ Коруны Полское и Великого княжества Литовского на том сойме при нас будучихъ. Дан через руки велможного Валентого Дембинского з Дембян, канцлера Короны Полское. Valentego Debinskie (подпись).

[/q]

[q]

...остров Трунив, с Трунива острова вдоль реки Словечна до болота Заремин, до реки Жидовой, вдоль реки Жидовой до Передела, с Передела до Лав, з Лав до Перетимля, з Перетимля Михачем болотом, з Михача в болото Тывров, до Чёрного-Острова, до реки Словечной, гранича с грунтами Невмержицкими, речка Роговка, лесами и поплесками, идя до волоки Кисиной, а Кисинска гранича до Окетых?…

[/q]

[q]

Село Фаринки включило в себе частини, які істрично були окремими населеними пунктами: Шиловичі, Березняки, Мар’янівку. Існує версія, що назва села походить від німецького слова «fähre» - пором, переправа.http://visti-kamenia.com/blog/...chini-0402

[/q]

[q]

1476 г. Продажная запись Опанаса Бабины-Хмелевского Волчку Жасковскому на им. Хмелевъhttp://www.runivers.ru/bookreader/book9530/#page/383

[/q]